Шу кунларда "Истиқлол”даги концертларга борсангиз, томошабинлар ҳолатини кузата туриб, болалигимизда бот-бот намойиш этилган бир мультфильм кадрлари ёдга тушади. Совуқда қолган қуёнчаларни қизалоқ рўмоли билан ўраб қўяди. Қулоқларини бекитса, оёқлари, оёқларини бекитса, қулоқлари чиқиб қолган қуёнчалар совуқдан зир-зир титрайди. Шунда қизалоқ сўрайди: "Совуқми?”. Дубляжда қуёнчаларга жуда ўхшатиб овоз беришганда: "Совууууққққ...Жудаям совууууққққ!!!”

"Истиқлол”да февралнинг 4 ва 5-саналарида эълон қилинган "Зўр-зўр стар”чилар концертига негадир омад кулиб боқмади. Ўзбекистон халқ артисти, "опера қироли” Исмоил Жалилов ва унинг "шаҳзода”си – Оскар Жалиловлар ташкил этган концертга ё аномал совуқ ҳалал берди ё концерт ташкил этиш бобида ҳали улар жуда ғўр. Бир томонлан тузук реклама ҳам қилингани йўқ. Шу совуқ кунларда кўчаларга баннер осмасдан саройга одам йиғиб бўладими?! Хуллас, концертнинг бир куни 4-феврал санаси бекор қилинди. 5-февралда томошабин зўрға йиғилди. Шунданми, томошабинини кутиб "кўзлари тўрт бўлган” қизил ўриндиқлар "маъюс” тортди...Юз эмас, анчаси...

Концерт тафсилотларидан олдин бошқа муҳим масалага тўхталсак. Муҳташам сарой нега бу қадар совуқ? Бу муаммони ким ҳал қилади? Концертда иштирок этган фотомухбиримиз сўзларига кўра, сарой маъмурияти бу муаммони ҳозирча бартараф қилишнинг илоди йўқлигини айтган. Сарой иситиш тизими масъулининг айтишича, ҳавонинг ҳаддан ташқари совуқлиги сарой иситиш тизимининг нормал ишлашига тўсқинлик қилмоқда. Концерт бошланишидан 1-2 соат олдин ишга туширилажак иситиш тизимининг кучи нимага ҳам етарди? Устига-устак электр энергиясини тежаш керак. Концерт куни эрталабдан то концерт тугагунига қадар иситиш тизимини ишга тушириш сарой иқтисодига салбий таъсир қилса керак-да?! Бироқ, томошабинда нима айб? У ҳам чипта харид қилсин, ҳам соғлиғини асраш ўрнига совуқдан титраб кетсинми? Этингиз аёздан увушиб турса, концерт татирмиди? Бу кетишда феврал ойида режалаштирилган бошқа концертлар тақдири нима бўлади? Саволлар кети узилмайди... Ҳозирча бир жавоб тайин: бир гап бўлар!

Энди концерт тафсилотларига ўтсак. Бошловчиликни "шаҳзода” ва актриса Шаҳзода Муҳамедова ўз зиммасига олди. Саҳнада навбатма-навбат намоён бўлган "Зўр-зўр стар”чилар ўз маҳоратларини жонли ижрода кўрсатишди. Улуғбек Холиқов, Шаҳло Аҳмедова, Фируза Жумаева кабилар концертни жонлантириб юборишди. Атласдан либос кийган Яна Бахтиеванинг рус тилидаги хониши,  Мадина Рашидованинг марҳума Уитни Хьюстон хотирасини ёд этгани, Расул Турсунхўжаевнинг Райҳон ("Юрагимдасан”) ва Риҳанна ("Олмослар”) ижодига мурожаати эсда қоларли бўлди.

Яна концертда меҳмон санъаткорлар ҳам қўшиқ куйлади. Аксарият томошабинлар эса харид қилинган чипталари увол бўлмасин учун концерт тезроқ ниҳоясига етишишини сабр билан кутишди.

Қишда концерт бериш осонмас! Ана шунақа гаплар...